IL Veten

Vi går i skogsterreng innover til ROSETSTØYLEN. Der openberrar det seg eit fantastisk utsyn over Indre Nordfjord. Løypa går deretter vestover i fjellsida til ULVEDALSSTØYLEN og BERGSETSTØYLEN, heile tida med god utsikt over landskapet. Dernest kjem INDRE og YTRE SØLVBERGSTØYLEN før vi går inn att til fritidssenteret.
Undervegs vil vi få litt orientering om støylane og ein del av det andre vi ser. Er vi heldige, treff vi folk i nokon av sela. Kanskje vankar det ein kopp kaffi også.
Turen er lett og går i roleg tempo. Det er ingen konkurranse om å kome først i mål. Vi startar ca. 500 m.o.h. Høgaste punktet ligg på ca. 730 m.o.h. Såleis er det ein snill tur. Vi reknar med å bruke ca. 4 timar alt etter kor mykje tid vi tek til pausar. Løypa er fin for dei som er usikre på kor langt dei vil gå. Det er nemleg merka stiar tilbake til Fritidssenteret frå alle støylane, så ein kan korte ned turen om ein ønskjer det.
Dette er eit gratistilbod for alle aldrar. Ta med gode kle, sko som toler vatn, mat og drikke. Møt opp på Nordfjord fritidssenter på Fjelli kl 12.00 så vil du få ein god tur i hyggeleg selskap.

Helsing
Trimgruppa